ထိုင်းနိုင်ငံ၊ ဘန်ကောက်မြို့၊ လတ်စီခရိုင်၊ ထုန်းဆုန်ဟုန်မြို့နယ်ရှိ ကွန်ဒိုခန်းတစ်ခုတွင် ကရင်အမျိုးသားအစည်းအရုံး(KNU)ထံပို့မည့် လက်နက်ခဲယမ်းများကို ထိုင်းရဲတပ်ဖွဲ့က ဧပြီလ ၂၅ ရက်တွင် ထပ်မံဖမ်းဆီးရမိခဲ့ကြောင်း Khaosod သတင်းဌာနတွင်ဖော်ပြချက်အရ သိရသည်။

ထုန်းဆုန်ဟုန်မြို့နယ်၊ ဆွိုင်ချိန်းဝတ္တနာ ၁၂ လမ်းသွယ် ၂ ရှိ ကွန်ဒိုအခန်းတစ်ခုတွင် လက်နက်များသိုဝှက်ထားသည်ဟူသော သတင်းအရ ထုန်းဆုန်ဟုန်ရဲစခန်းက ဝင်ရောက်စီးနင်းရှာဖွေခဲ့ရာမှ အဆိုပါလက်နက်များကိုတွေ့ရှိခဲ့ခြင်းဖြစ်သည်။

အဆိုပါကွန်ဒိုအခန်းတွင် နေထိုင်သူသည် ဧပြီလ ၁၂ ရက်တွင်အခန်းမှထွက်ခွာသွားပြီး ယခုအချိန်ထိ ပြန်မလာသေးကြောင်း ကွန်ဒိုအဆောက်အဦ၏ တာဝန်ရှိသူက ပြောကြားချက်အရ သိရသည်။

ယခုဖမ်းမိသော လက်နက်များသည် ပြီးခဲ့သောဧပြီလ ၂၃ ရက်နေ့လယ်ပိုင်းက  ထိုင်းနိုင်ငံ၊ ချင်းမိုင်မြို့၊ တူးမြောင်းလမ်းပေါ်တွင် ထိုင်းနိုင်ငံသား ၂ ဦးနှင့်အတူဖမ်းဆီးရမိခဲ့သော KNU သို့ပို့မည့် လက်နက်အမှု၏ကွင်းဆက်ဖြစ်ကြောင်း ထိုင်းရဲတပ်ဖွဲ့က ထုတ်ပြန်ခဲ့သည်။

ဓာတ်ပုံ- Khaosod