တရုတ်ကြက်ခြေနီယာဉ်တန်းကို တိုက်ရိုက်မပစ်ခတ်ခဲ့ဘဲ မိုးပေါ်သို့ သေနတ် ၃ ချက်ပစ်ဖောက်ခဲ့ခြင်းသာဖြစ်ကြောင်း စစ်ကောင်စီပြန်ကြားရေး ဇော်မင်းထွန်းက ပြောသည်။
ပြီးခဲ့သော ၂၀၂၅ ခုနှစ်၊ မတ်လ ၁ ရက်၊ ည ၉နာရီခွဲဝန်းကျင်က နောင်ချိုမြို့နှင့် ပြင်ဦးလွင်မြို့အကြားတွင် စစ်ကောင်စီတပ်က တရုတ်နိုင်ငံမှလာရောက်သည့်ကြက်ခြေနီအဖွဲ့၏ ယာဉ် ၉ စီးကို ပစ်ခတ်ကြောင်း TNLA ကသတင်းထုတ်ပြန်ထားသည်။
“ အဲဒီယာဉ်တန်းက မြန်မာနိုင်ငံနဲ့ သက်ဆိုင်ရာသံရုံး၊ စစ်သံရုံးတွေကို ကြိုတင်အကြောင်းကြားထားခြင်းမရှိတာကို သိရှိရပါတယ်။ ယာဉ်တန်းကို မီးထိုးအချက်ပြပြီး တားဆီးခဲ့ပေမဲ့မရတာကြောင့် သေနတ် ၃ ချက် မိုးပေါ်ထောင်ပစ်ခဲ့ရပါတယ်။ အဲဒီတော့မှ ယာဉ်တန်းက နောင်ချိုဘက်ကိုပြန်လှည့်သွားပါတယ်” ဟု စစ်ကောင်စီ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းကပြောသည်။
ယာဉ်တန်းပစ်ခတ်ခံရသည့်အုမ္မသီးရွာသည် စစ်ကောင်စီနှင့် တအာင်း(ပလောင်) အမျိုးသားလွတ်မြောက်ရေးတပ်မတော်(TNLA) တို့အကြား စစ်ဆိုင်ထားသည့်နေရာဖြစ်ပြီး ဖြစ်စဉ်နှင့်ပတ်သက်၍ဆက်လက်စုံစမ်းမေးမြန်းနေကြောင်းလည်း ၎င်းက ဆက်လက်ပြောကြားသည်။
လက်ရှိတွင် တရုတ်နိုင်ငံကြက်ခြေနီယာဉ်တန်းကို ပလောင် (တအာင်း) အမျိုးသားလွတ်မြောက်ရေး တပ်မတော်(TNLA )က ကာကွယ်စောင့်ရှောက်ပေးထားကာ လိုရာခရီးသို့ ဆက်လက်ပို့ဆောင်ပေးသွားမည်ဖြစ်ကြောင်း သိရသည်။