ကရင်နီပြည်နယ်မှ ရှမ်းပြည်နယ်တောင်ပိုင်းသို့စစ်ဘေးရှောင်နေသူများကို စစ်ကောင်စီလက်အောက်ခံ အထွေထွေအုပ်ချုပ်ရေးဦးစီးဌာနက ယခုမတ်လမကုန်မီနေရပ်အပြီးပြန်ခိုင်းသဖြင့် အခက်ကြုံနေရကြောင်း စစ်ဘေးရှောင်အရေးကူညီသူများထံမှ သိရသည်။
ရှမ်းပြည်နယ်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ပင်လောင်းမြို့နယ်၊ ဆီဆိုင်မြို့နယ်၊ ဟိုပုံးမြို့နယ်နှင့် တောင်ကြီးမြို့နယ်၊ ညောင်ရွှေမြို့နယ်တို့တွင်ရောက်ရှိနေသည့် စစ်ဘေးရှောင် ၂၂၀၀ ဦးကျော်ကို နေရပ်ပြန်ခိုင်းရန် အထွေထွေအုပ်ချုပ်ရေးဦးစီးဌာနက ရွာ၊ ရပ်ကွက်အုပ်ချုပ်ရေးမှူးများမှ တစ်ဆင့် ညွှန်ကြားထားခြင်းဖြစ်သည်။
“အုပ်ချုပ်ရေးမှူးက လာပြောသွားတာ။ ထွေအုပ်က ဒီလကုန်ပြီးရင် စစ်ဘေးရှောင်တွေကို ဆက်ပြီးတော့ လက်မခံဖို့ ညွှန်ကြားလာလို့ဆိုပြီး လာပြောသွားတာ။ ဟိုဖက်မှာ ငြိမ်းချမ်းနေပြီမလို့ ကိုယ့်အိမ်ကို ပြန်ကြဖို့၊ အဲဒီမှာပဲ ပုံမှန်အတိုင်းပြန်နေကြဖို့လာပြောတာ”ဟု စစ်ဘေးရှောင်အရေးကူညီနေသူတစ်ဦးက Newshive သတင်းဌာနသို့ ပြောသည်။
အဆိုပါစစ်ဘေးရှောင်များသည် ဘုန်းကြီးကျောင်းများ၊ ဘာသာရေးအဆောက်အအုံများ၊ ရပ်ကွက်/ကျေးရွာပိုင် ခန်းမအဆောက်အဦးများတွင် ရောက်ရှိခိုလှုံနေကြရသကဲ့သို့ မိုးကာတဲများ တည်ဆောက်ပြီး နေထိုင်ကြသူများလည်းရှိကြောင်း သိရသည်။
လက်ရှိတွင် ကရင်နီစစ်ရှောင်များမှာစားဝတ်နေရေးခက်ခဲနေသည့်အပြင် နေရပ်ပြန်ရန် လမ်းစရိတ်ပင် မရှိကြကြောင်း သိရသည်။
“ဒီမှာက အလှူရှင်တွေလည်း မရှိတာကြာပြီ။ ကိုယ့်အစီအစဉ်နဲ့ ကိုယ်ကြုံရာကျပန်းလုပ်ပြီးပဲ ရှာစားနေရတာ။ ပြန်စရာအိမ်လည်း မရှိတော့ဘူး။ အခုလကုန်ရင်တော့ ပေးမနေတော့ဘူးလို့ ပြောတယ်။ ဘာဆက်လုပ်ရမှန်းတောင် မသိတော့ဘူး”ဟု ကရင်နီစစ်ဘေးရှောင်တစ်ဦးက Newshive သတင်းဌာနသို့ ပြောသည်။
၎င်းစစ်ဘေးရှောင်များသည် လွိုင်ကော်မြို့မှ တိမ်းရှောင်လာသူများဖြစ်ပြီး အများစုသည် မြို့များ၏ အနီးတဝိုက်ရှိတောများတွင် ယာယီမိုးကာတဲများဖြင့် နေထိုင်နေကြကြောင်း သိရသည်။