မြန်မာနိုင်ငံတွင် ၂၀၂၅ ခုနှစ်၊ ဒီဇင်ဘာ သို့မဟုတ် ၂၀၂၆ ခုနှစ်၊ ဇန်နဝါရီတွင် ရွေးကောက်ပွဲကျင်းပမည် ဖြစ်ကြောင်း အကြမ်းဖက်စစ်တပ်ခေါင်းဆောင်မင်းအောင်လှိုင်က ပြောသည်။

 

ဘယ်လာရုစ်သမ္မတနိုင်ငံ သမ္မတ H.E. Mr.Alexander Gregoryevich Lukashenko နှင့် မင်းအောင်လှိုင်တို့ တွေ့ဆုံစဉ်အတွင်း ထိုကဲ့သို့ပြောကြားလိုက်ခြင်း ဖြစ်ကြောင်း စစ်ကောင်စီသတင်းမှန်ပြန်ကြားရေး အဖွဲ့က ထုတ်ပြန်သည်။

 

“မကြာခင်မှာလည်း ဥပဒေနှင့်အညီ ရွေးကောက်ပွဲကျင်းပသွားဖို့ရှိပါတယ်။ လွတ်လပ်ပြီး တရားမျှတတဲ့ရွေးကောက်ပွဲကို ၂၀၂၅ ခုနှစ်၊ ဒီဇင်ဘာလ (သို့မဟုတ်) ၂၀၂၆ ခုနှစ်၊ ဇန်နဝါရီလ အစောဆုံး ကျင်းပသွားဖို့စီစဉ်ထားကြောင်း ပြောလိုပါတယ်” ဟု မင်းအောင်လှိုင်က ပြောသည်။

 

အဆိုပါရွေးကောက်ပွဲကို ဘီလာရုစ်သမ္မတနိုင်ငံမှ လေ့လာရေးအဖွဲ့များကိုလည်း လာရောက်ကြည့်ရှုနိုင်ရန် ဖိတ်ကြားခဲ့ကြောင်း သိရသည်။

အဆိုပါရွေးကောက်ပွဲတွင် ဝင်ရောက်ယှဉ်ပြိုင်ရန် ပါတီပေါင်း ၅၃ ခုက မှတ်ပုံတင် စာရင်းသွင်းထားကြောင်းလည်း သိရသည်။

 

မင်းအောင်လှိုင်ဦးဆောင်သောစစ်ကောင်စီက ပြီးခဲ့သော ၂၀၂၁ ခုနှစ်၊ ဖေဖော်ဝါရီလ ၁ ရက်တွင် ပြည်သူတင်မြှောက်သောအနိုင်ရပါတီကိုလက်မခံဘဲ အာဏာသိမ်းခဲ့ကာ အပြစ်မဲ့ပြည်သူများကို ဖမ်းဆီး၊ နှိပ်စက်၊ သတ်ဖြတ်မှုများ ဆက်တိုက်ကျူးလွန်ခဲ့ကြသည်။