နေပြည်တော် PDF ပျဉ်းမနားစစ်ကြောင်းစစ်ကြောင်းမှူး ရဲဘော်ကိုစိုင်း နှိပ်စက်ခံရသည့်ပြင်းထန်ဒဏ်ရာများနှင့်သေဆုံးမှုအပေါ် ကယန်းပြည်သစ်တပ်မတော်အနေဖြင့်ဖြေရှင်းပေးရန် နေပြည်တော်တိုင်းစစ်ဌာန၊ အလယ်ပိုင်းတိုင်းစစ်ဌာနချုပ်၊ ပြည်သူ့ကာကွယ်ရေးတပ်မတော်က တောင်းဆိုလိုက်သည်။
ဖြစ်စဉ်မှာ ပြီးခဲ့သော ၂၀၂၅ ခုနှစ် မတ်လ ၃ ရက်နေ့ နေ့လည် (၁) နာရီ တွင် နေပြည်တော်တိုင်းစစ်ဌာန ပျဉ်းမနားစစ်ကြောင်း စစ်ကြောင်းမှူး ရဲဘော်ကိုစိုင်း(ခ)ဝင်းလှိုင်ကို အား ကယန်းပြည်သစ်တပ်မတော် ဗဟိုကော်မတီဝင် ဗိုလ်မှူးကြီးသိန်းဟန် နှင့် တွေ့ဆုံဆွေးနွေးရန်ဟုဆိုကာ ကယန်းပြည်သစ်နယ်မြေ၊ အမှတ်(၆)မြို့နယ် ဒုတပ်မဟာမှူးဖိုးခွား မှ လာရောက်ခေါ်ဆောင်သွားခဲ့ကြောင်း သိရသည်။
၄င်းဖြစ်စဉ်အပေါ်တွင် ကယန်းပြည်သစ်တပ်မတော်ဘက်သို့ နေပြည်တော်တိုင်းစစ်ဌာနမှ အခြေအနေအကြောင်းအရင်းသိရှိရန် ၂၀၂၅ ခုနှစ် မတ်လ ၇ ရက်တွင် စာအမှတ် (၀၀၈/၂၀၂၅)နပတ(ဦးစီး) ဖြင့် စာထုတ်၍အကြောင်းကြားသော်လည်း အကြောင်းပြန်ကြားလာခြင်းမရှိခဲ့ကြောင်း သိရသည်။
ထို့အပြင် ကယန်းပြည်သစ်တပ်မတော်နယ်မြေအထိ သွားရောက်တွေ့ဆုံဆွေးနွေးရန် ကြိုးစားခဲ့သော်လည်း ဗဟိုကော်မတီများမှ တွေ့ဆုံဖြေရှင်းပေးခြင်းမရှိကြောင်း သိရသည်။
ထို့နောက် ၂၀၂၅ ခုနှစ်၊ မတ်လ ၁၃ ရက်တွင် ကယန်းပြည်သစ်တပ်မတော် ရုံးစိုက်ရာနယ်မြေ တစ်နေရာ၌ တော်လှန်ရေးဦးဆောင်သူ ရဲဘော်တစ်ဦးဖြစ်သည့် ရဲဘော်ကိုစိုင်း(ခ)ဝင်းလှိုင်ကို ၏ ရုပ်အလောင်းကို ဒဏ်ရာများစွာဖြင့် ရှာဖွေတွေ့ရှိခဲ့ရကြောင်း သိရသည်။
အဆိုပါဖြစ်စဉ်နှင့်ပတ်သက်ပြီး နေပြည်တော်တိုင်းစစ်ဌာန၊ အလယ်ပိုင်းတိုင်းစစ်ဌာနချုပ်၊ ပြည်သူ့ကာကွယ်ရေးတပ်မတော်က အချက် ၃ ချက်ဖြင့် ဖြေရှင်းပေးရန် ကယန်းပြည်သစ်တပ်မတော်အား ၂၀၂၅ ခုနှစ်၊ မတ်လ ၁၃ ရက်တွင် အိတ်ဖွင့်ပေးစာ ပေးပို့ထုတ်ပြန်ထားသည်။