တရုတ်နိုင်ငံသို့သွားရောက်မည့် စစ်ခေါင်းဆောင်မင်းအောင်လှိုင်၏ခရီးစဉ်အတွင်း မြန်မာနိုင်ငံရွေးကောက်ပွဲလုပ်ငန်းစဉ်များရှင်းပြပြီးတရုတ်နိုင်ငံ၏ထောက်ခံမှုရရှိရေး ဆောင်ရွက်သွားရန်ရှိကြောင်း News Hive သတင်းဌာနမှစုံစမ်းသိရှိရသည်။
စစ်ခေါင်းဆောင်မင်းအောင်လှိုင်သည် တရုတ်နိုင်ငံ၏ဖိတ်ကြားချက်အရ မကြာမီရက်ပိုင်းအတွင်း သွားရောက်ရန်စီစဉ်ထားကြောင်း သိရသည်။
“ အဓိကက မြန်မာနိုင်ငံမှာလက်ရှိရွေးကောက်ပွဲလုပ်ဖို့က အခြေအနေမကောင်းဘူးဆိုတာကို စစ်တပ်က ကောင်းကောင်းနားလည်ထားတယ်။ အခန့်မသင့်ရင် ဒီရွေးကောက်ပွဲကို နိုင်ငံအတော်များများက အသိအမှတ်မပြုဘူးဖြစ်လာနိုင်တယ်။ ဒါကြောင့် မင်းအောင်လှိုင်က သူတို့နဲ့ပနံသင့်နေတဲ့ တရုတ်၊ ရုရှားတို့ရဲ့ထောက်ခံမှုရဖို့ အသည်းအသန်လုံးပန်းနေတယ်” ဟု အမည်မဖော်လိုသူစစ်တပ်အတွင်းသတင်းပေးက News Hive သတင်းဌာနသို့ပြောသည်။
မင်းအောင်လှိုင်သည် ခရီးစဉ်အတွင်း တရုတ်ပြည်သူ့သမ္မတနိုင်ငံ ထျန်းကျင်းမြို့၌ကျင်းပမည့် ရှန်ဟိုင်းပူးပေါင်းဆောင်ရွက်မှုအဖွဲ့ ထိပ်သီးအစည်းအဝေး(Shanghai Cooperation Organisation – SCO SUMMIT 2025)သို့တက်ရောက်ခြင်း၊ ပေကျင်းမြို့၌ကျင်းပပြုလုပ်မည့် တရုတ်ပြည်သူများ၏ ဂျပန်ခုခံတော်လှန်ရေးစစ်ပွဲနှင့်ကမ္ဘာ့ဖက်ဆစ်ဆန့်ကျင်ရေးစစ်ပွဲအောင်နိုင်ခြင်း နှစ်(၈၀)ပြည့်အထိမ်းအမှတ် စစ်ရေးပြအခမ်းအနားသို့တက်ရောက်ခြင်းတို့ပြုလုပ်မည်ဖြစ်ကြောင်း သိရသည်။
ထို့အပြင် နှစ်နိုင်ငံအစိုးရနှင့်ပြည်သူများအကြား ချစ်ကြည်ရေး၊ စီးပွားရေးနှင့် ကဏ္ဍပေါင်းစုံတွင် ပူးပေါင်းဆောင်ရွက်မှုများ ပိုမိုဖွံ့ဖြိုးတိုးတက်ခိုင်မာအောင် ဆွေးနွေးဆောင်ရွက်သွားမည်ဟုသာ ယေဘုယျဆန်ဆန် ထုတ်ပြန်ထားသည်။